राजकीय

लोकशाही झाली झुंडशाही

उषःकाल होता होता काळरात्र झाली कधी ते कळलेच नाही

लोकशाहीची झुंडशाही झाली कधी ते कळलेच नाही….

शतकांच्या गुलामी नंतर सरला होता अंधकार

स्वातंत्र्याचा उद्घोष होता वंदे मातरम जयजयकार

पिढ्या पिढ्या चालले होते यशस्वी ते संगर

विचार त्यांचे पुसले गेले कधी ते कळलेच नाही

लोकशाहीचे उभवायचे होते एक भव्य मंदिर

लोकशिक्षण जनजागृती करायचा समाजाचा आधार

परंपरा जपत करता सीमांचा ही विस्तार

मतांच्या बेरजेत तुकडे झाले कधी ते कळलेच नाही.

उगवले बुरशी वाणी जाती धर्मांचे स्वार्थी गट

शकुनीचे फासे खेळती मांडती नवे द्युतपट

फितूरीचा शाप पुन्हा शत्रू बरोबरच आखती कट

विश्वासाला तडे गेले कधी ते कळलेच नाही

नुसती चिखल फेक राजकारण बनले आखाडे

अतिरेकी घुसखोरी दिसेना डोळ्यावर की झापडे

वाचाळ बनती विद्वान लचके तोडती गिधाडे

स्वप्ने घायाळ झाली कधी ते कळलेच नाही.